ភ្នំពេញ៖ រាជរដ្ឋាភិបាលកម្ពុជាបានប្រកាសបន្តលើកលែងការបង់ពន្ធប្រចាំខែគ្រប់ប្រភេទ លើកលែងតែអាករលើតម្លៃបន្ថែម និងលើកលែងពន្ធលើប្រាក់ចំណូលសម្រាប់ឆ្នាំ២០២២ ចំពោះសណ្ឋាគារ ផ្ទះសំណាក់ និងក្រុមហ៊ុនភា្នក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មនៅភ្នំពេញ ខេត្តសៀមរាប និងខេត្តព្រះសីហនុរយៈពេល ៣ខែបន្តទៀត ចាប់ពីខែតុលា ដល់ខែធ្នូ ឆ្នាំ២០២២។

ក្នុងសេចក្តីប្រកាសព័ត៌មានរបស់រាជរដ្ឋាភិបាលនៅចេញផ្សាយនៅថ្ងៃទី២៥ ខែតុលា ឆ្នាំ២០២២ បានបញ្ជាក់ថា ទោះបីមានការអនុគ្រោះរយៈពេល ៣ខែបន្តទៀត ប៉ុន្តែអាជីវកម្មទាំងនេះនៅតែមានកាតព្វកិច្ចដាក់ប្រកាសពន្ធអាករ និប្រើប្រាស់ប្រព័ន្ធអនឡាញសម្រាប់ការគ្រប់គ្រងអាករលើតម្លៃបន្ថែម (E-VAT) ជារៀងរាល់ខែ។ ជាមួយគ្នានេះអាជីវកម្មនៅតែមានកាតព្វកិច្ចដាក់លិខិតប្រកាសពន្ធលើប្រាក់ចំណូលប្រចាំឆ្នាំ២០២២ យ៉ាងយឺតបំផុតឱ្យបានមុនដំណាច់ខែមីនា ឆ្នាំ២០២៣។

រាជរដ្ឋាភិបាលបានណែនាំឱ្យបន្តជំរុញអាជីវកម្មក្នុងវិស័យទេសចរណ៍ រៀបចំកម្មវិធីអភិវឌ្ឍន៍ជំនាញជូនដល់បុគ្គលិករបស់ខ្លួន និងមានលទ្ធភាពស្នើសុំការគាំទ្រហិរញ្ញប្បទាន ពីសំណាក់គម្រោងមូលនិធិអភិវឌ្ឍន៍ជំនាញ (SDF) តាមការចាំបាច់។

ការសម្រេចរបស់រាជរដ្ឋាភិបាលនេះ ដោយយល់ឃើញថាក្រោយកម្ពុជាបានបើកដំណើរការគ្រប់វិស័យ ដោយគ្រប់វិស័យគឺសុទ្ធសឹងតែងើបឡើងវិញយ៉ាងល្អប្រសើរ។ ដោយឡែកវិស័យទេសចរណ៍ ទោះបីចំនួនភ្ញៀវទេសចរមានការកើនឡើងក៏ដោយ ប៉ុន្តែកំណើននេះនៅមានកម្រិតនៅឡើយ។ ដូច្នេះ ការអនុគ្រោះនេះគឺធ្វើឡើងដើម្បីគាំទ្រការងើបឡើងវិញនៃវិស័យទេសចរណ៍នៅកម្ពុជា។

ជាមួយគ្នានេះ រាជរដ្ឋាភិបាលកត់សម្គាល់ថា ទោះបីស្ថានភាពជំងឺកូវីដ-១៩ មានភាពធូរស្បើយ ប៉ុន្តែបញ្ហាប្រឈមមួយចំនួន គឺសង្គ្រាមរវាងរុស្ស៊ី និងអ៊ុយក្រែន និងការកើនឡើងនៃអតិផរណាបាន និងកំពុងបង្កនូវហានិភ័យ និងផ្តល់ផលប៉ះពាល់ដល់ការងើបឡើងវិញនូវសេដ្ឋកិច្ចសកលទាំងមូល៕